Svjetski dan pozorišta za djecu i mlade

U utorak 20. marta u teatrima širom svijeta biće obilježen Svjetski dan pozorišta za djecu i mlade pod motom „Povedite dijete u pozorište danas“ (Take a child to the theatre today). Na ovaj dan hiljade pozorišta i individualnih članova okupljenih u više od 85 nacionalnih ASSITEJ centara u svijetu, čita poruke istaknutih svjetskih umjetnika i priprema posebne programe kako bi se skrenula pažnja kulturne i šire javnosti ka pozorišnoj umjetnosti zа djecu i mlаde.

Na Velikoj sceni Crnogorskog narodnog pozorišta u 12 sati u okviru Dječje scene biće izvedena predstava Petra Pejakovića “Njegoš za djecu – kako rastu veliki ljudi”. Ova scenska bajka bavi se Njegoševim djetinjstvom, od rođenja do trenutka kada postaje vladar Crne Gore. Predstava otkriva odgovore na pitanja kako u maloj zemlji, u malom mjestu, skučen velikim brdima, izrasta veliki čovjek širokog uma. U predstavi igraju Mišo Obradović i Slaviša Grubiša.

Prije izvođenja predstave, glumica Crnogorskog narodnog pozorišta Andrea Mugoša pročitaće poruku koju je ove godine napisao  Mo Vilems, američki autor, ilustrator i dramski pisac.

Poruka Moa Vilemsa povodom Svjetskog dana pozorišta za djecu i mlade

               Svjetski dan pozorišta za mlade? Stvarno? 

                Zašto biste baš vi, od svih ljudi na svijetu, poveli dijete da vidi “dječije pozorište”? Zar nemate boljih stvari da radite nego da gledate gomilu odraslih ljudi, koji su obično toliko ozbiljni i dosadni, kako se prave glupi ili su bučni ili tužni ili smiješni, samo da bi zadivili dijete koje volite? Mislim, ko još želi da bude prenijet u svijet mašte i priče? Ko želi da doživi likove i emocije koji su iz drugog svijeta, a tako su bliski? Da li vam je zaista potrebna u vašem životu čarolija, čarolija žive predstave koja preobražava? Da li je gledanje te čarolije kroz oči djeteta po vama u redu? Hajde da budemo realni: da li vam se sviđa stvaranje uspomena koje će mladoj osobi koju volite biti odskočna daska za buduću igru?

                Čekajte.

                Pa to zvuči čudesno.

                Kada se smjestite na svoja sjedišta i zavjesa se podigne, znajte da ćete vidjeti više od same predstave; doživjećete novu, posebnu povezanost sa djetetom koje vam mnogo znači.

                Ah da, i to dijete će se vjerovatno zabaviti. 

Ps:

Svjetski dan pozorišta za mlade je 20. marta 2018. godine. Ali, čarolija pozorišta koja preobražava nastavlja se na neodređeno vrijeme.

Poruka Muhameda Al Jounde povodom Svjetkog dana pozorišta za djecu i mlade

Pozorište je još uvijek jedan od najboljih načina da se izrazite i ogledalo u kojem ljudi
mogu vidjeti što je u našem svijetu dobro, a što loše; scena je prostor na kojem
možete stvoriti sopstveni svijet, gdje možete gledati kako se vaši snovi pretvaraju 
stvarnost.

Djeca s kojom sam radio pokazala su nam svoju prošlost i budućnost kakvu
žele kroz predstavu što su je napisala i odigrala. Doprli su do srca ljudi i omogućili im
da dožive ono što je za njih same bilo stvarno upravo zato što ni u jednom trenutku nisu
glumili, nego su pokazali svoje osjećaje i svoju stvarnost kroz dodir umjetnosti.