Snažan početak godine u nacionalnom teatru: Pred punim gledalištem CNP-a izvedena predstava „U očekivanju oca”

Januarski repertoar Crnogorskog narodnog pozorišta (CNP) otvoren je sinoć gostovanjem Kazališta Marina Držića iz Dubrovnika s predstavom „U očekivanju oca”, prema novom dramskom tekstu Mira Gavrana, u režiji Paola Tišljarića. Gostovanje je privuklo veliko interesovanje, pa je crnogorska publika u punoj sali nacionalnog teatra glumački i kreativni tim predstave pozdravila gromoglasnim aplauzom.

Predstava „U očekivanju oca” otvara važne porodične teme, pitanja ljubavi, predanosti i odanosti. Kroz priču prikazanu u različitim vremenskim skokovima pratimo kako se međuljudski odnosi transformišu, kako se ljudi mijenjaju ili kako, pak, njihova narav ostaje ista.

Sjajnom igrom, glumica Areta Ćurković uvjerljivo donosi nesvakidašnju priču glavne protagonistkinje Jane koja i u grotesknim situacijama ostaje istrajna u svojim uvjerenjima te privržena svojoj porodici.

„Uvijek kada krenem kreirati svoje likove mene zanima istina u njima. Mislim da onda stvari same izlaze van, ne moramo puno raditi ako dubinski proživimo to što igramo. Ovaj komad je zahtjevan jer ima šest segmenata u kojima je sve vrlo slično, te sam trebala stvoriti luk od početka gdje igram mlađu ženu sa dvoje male djece, pa do perioda kada su oni vjenčani i zreli. Ako ne tražiš neke dubinske razloge u psihologiji i patologiji odnosa, već ako povjeruješ i baziraš se na odanost i ljubav, onda dobiješ ono što smo mi ponudili kroz predstavu“, istakla je Ćurković.

Kvalitetu predstave, likom Ane, sjajno doprinosi i glumica Srđana Šimunović.

„Osnovni dio komada i najvažnija ćelija bilo kog života je porodica. U njoj se događaju najveće tragedije, ali i najveće komedije. Ovaj komad priča upravo o tome kako u malim stvarima možeš pronaći veliki problem, a u velikim problemima možeš pronaći malu sreću. Uživanje je igrati Gavranove tekstove, a ovaj komad nije opterećujući za glumca – dopušta vam puno, možete se zaigrati i uživati. Mi smo se kao ekipa, uz našu gošću Aretu koja nam je došla iz Osijeka i našeg penzionera, prvaka Branimira Vidića Fliku, umrežili. Svakog puta nam je užitak igrati, a publika nas je ovdje jako toplo i divno primila na čemu joj iskreno zahvaljujem“, istakla je Šimunović.

Pored Arete Ćurković, Branimira Vidića Flike i Srđane Šimunović, u glumačkoj podjeli su i Nika Matušić, Nikola Radoš, Boris Matić, Bojan Beribaka i Ines Tričković.

Direktor Crnogorskog narodnog pozorišta Ilija Subotić podsjetio je da je sinoćnje gostovanje predstave „U očekivanju oca” realizovano u okviru nastavka uspješne saradnje dva teatra.

„CNP i Kazalište Marina Držića su početkom 2024. godine potpisali sporazum o saradnji koji je do sada rezultirao razmjenom predstava, tako da se Crnogorsko narodno pozorište pred cijenjenom dubrovačkom publikom predstavilo produkcijama „Ja sam ona koja nisam“ prema Matu Matišiću, u režiji Vita Taufera, kao i s predstavom „Gospoda Glembajevi“ prema Miroslavu Krleži, u režiji Danila Marunovića, pri čemu ćemo 18. marta ove godine gostovati u Dubrovniku s višestruko nagrađivanom predstavom „Naličje“ – autorskim projektom reditelja Borisa Liješevića. Kolege iz Kazališta Marina Držića u protekle dvije godine na velikoj sceni CNP-a gostovali su s predstavama „Kraljice“ prema Šekspiru, u režiji Livije Pandur i „Vidi kako Lokrum pere zube“, prema Ivani Lovrić-Jović, u režiji Paola Tišljarića“, napomenuo je Subotić.

Kako je podsjetio Subotić, u Crnogorskom narodnom pozorištu u toku su probe za predstave „Pred penzijom – komedija o duši“, Tomasa Bernharta u režiji Nataše Milićević, čija je premijera u februaru i „Kockar“, koja će premijerno, prema F. M. Dostojevskom u režiji Lidije Dedović, biti izvedena u martu.

Publika se o aktivnostima nacionalnog teatra može informisati putem veb-sajta cnp.me, na biletarnici, društvenim mrežama Facebook i Instagram, kao i Viber kanalu.

Ponosni prijatelj CNP-a je Crnogorska komercijalna banka.